MESMERISING SPIRITS

Zanlai pelh hret a ni a, Delhi atan chuan a la tlai hauh lo mai. Pawnah chuan car tlan ri vang vang hriat tur pawh a la tam hle. Tlema hla deuha ui zanvak han bauh \hat \hat te chuan engemawtikawng zawng tak chuan khawhar a hnem ve riau a. Ka room chhung chu ka’n thlek kual vel a, ka vahvaihna rama ka bungraw neih chu kan thlir kual vel a, a awm ve ram mai. Mahni ram leh in ni lo na na na chu duh angin pindan pawh a chei theih hauh loh mai. Kil khat a\ang chuan vur bawm \awng\awl tawh tak chuan putar lung \halo ang maiin min lo chik khum \uah \uah a. A sir lawkah ka bisleri tui bawm pawh chuan enchian a dawl fahran lo. Pum tha tak tan lo phei chuan a chhunga tui awm chu han in ngam hi a ni lo reng reng. Bottle pawl langtlang thei a nih lai kha chuan a chhungah chuan ISI hriatpui thlap tui thlitfim chu a awm ve ngei mai. Mahse, tunah zawng chungte chu pyramid sak lai hun ang daih kha a ni tawh, Delhi Jal Board tui ngei mai chuan riahrun a rem tawh a ni. Ka choka ve deuh ka’n thlek phei leh, bel pisil tak, \hiante haw turin duhsak taka min pek, aluminium sawi tak tak chu a awm ve niaih a. Ka cooker neih ve phei chu mikhual te a chhum tir ngam tawh lo reng reng; phit duh dan leh a hun te a neih mai bakah tui leh buhfai mixture a fuh lo vaih chuan a put tluk tluk thei. A chhung hel phukin a sir ut vek khawp ten a chhum theih.

Han sawi zel takah chuan he cooker neitu hmasa hian chanchin a ngah phian a. Kan \hianpa hi kum 20?? khan Delhi a lo chuangchhuak ve a. An khua leh a chhehvel a\anga Silchar pela lehkhazir hmasa ber a nih avang khan an khaw ho khan an chhuang ve hle mai a. Chuvang chuan buhfai tui a ei loh hlauin a chhumna tur Hawkins pressure cooker ngei mai chu an rawn puanhnuai thlaktir ta pek a. Chu cooker nen chuan thiamzir turin Delhi khawpui chu rel a\angin a rawn hawi lut ve heu mai a. Delhi hmar lamah han inbengbel vein Indian history-a a ngaihsan em em Shivaji College-ah ngei mai chuan lehkha a rawn zir ve ta a. Mahse, chu Maratha pasal\ha huaisen chuan Mughal lalho a chhaih buai tluk zetin a lo chhaihbuai ve leh si. Ral rel turin nitin DTC bus han lawn \hin teh mahse Maratha general ropui chuan a zirna in chhungah chuan a sipai te nen a lo hnehchhiah tlat \hin avangin a tawpa tawpah chuan a puanthuah telin South Ex lam chu a pan phei leh ta a. Chutah chuan a cooker rinawm tak chuan a kalpui zel a. Maratha raldo hneh lo chuan Bill Gates leh a \huihruaite bitumin computer khawvel chu han luhchhuah a tum leh ta a. Nehru Place-a computer a va lei zo, a lo haw ni chuan a rawn pawr ngei mai le. Pasal\ha ramvak sazuk pachal kihreu bum tawh rawn kap haw lam nen aa rawn invaivung dan vel dan a\ang chuan an inang reng mai le. RAM chuti zat a hmang a, a hard disk pawh chuti vat a rawn ti zut zut mai han hriat phei chuan khawchhak lam unau sumdawngin Omega sana Seiko aiin a \hatthuzia a sawite pawh min ti hrechhuak rum rum mai le. Chung karah chuan a cooker chuan huaisen takin a kalna lam apiangah kalpui ve zelin a khua ten an beisei ang ngeiin buhchangrum tui tak chu a chhumsak zel a. Mahse, mihring te hi chau thei, zuai thei kan lo ni a, khawl thil pawh chu chutiang bawkin tlin chin nei kan lo ni a.

Computer pathum zet a khalhchhiat \hak hnu pawha mIRC chat-a admin nih bak a la thiamchhuah theih tak si loh avangin Zoram lamah meikhupin a haw chho ta zawk a. A haw hma zan chuan kan in 21-naah a cooker ropui chu ka man ta hlauh mai a, mahse a reina leh upatna chuan chaw chhum tui aiin phuilohna leh fellohnaah a tlakbuak a, chaw ti deuh phek phuk chu ka ei ta fo mai a. A dang man tur nei nghal bik lo chuan kan chhum kan chhum a, kan in phun lungawi mai bawk a. Nun pawh hi a kal a kal a, a tawpah chuan \awng\awl tak pawhin a lo chhuah ve theih tho mai le.

Ka \hutna chu siam\hain ka hmaa computer chu ka han khawih vel a. Kan \hianpa pakhatin, a bialnu nena an inhauh apianga a play \hin, Dr. Hook hla, Storms never last chu ka zaichhuahtir nawlh mai a. Nia, ngaihzawngte nena han inhauh bap bap chuan \o rawn haw tur ang khup khup maiin khua an dur ang khuih khuih a, thli lo thaw chak deuhin thlipui namen lovin min nuai mai dawn ta emaw tih tur mai khawpin a rawn in\am ta \hin. Mahse, zan a liam a, zingah chuan khua lo varin a hma ni lawk khawdur leh chhum dum chu thawnthu hlui ang maiin a reh a, khaw a lo thar \ha leh \hin. Khawpui ri rum rum te, thlipui leh chhum dum te hian kian hun a nei. Kan nunah te pawh hian chhum dum te, thil \halo te, theihnghilh kan duh ngawih ngawih te pawh a awm ve tho. Chungte chu khawvar leh hun ralin a kalsan pui te pawh a awm ve \hin. Chutih lai erawh chuan keimahni ngei pawh hian \an lai lova Samdala chengkek nghah taka hun \ha lo thleng tur nghaha, sik leh sa khel lova a danglam ang \hin ngawt chu a ni lo deuh e.

Ka \hianpa cooker min rochun en vang vang chuan thil mi tihrechhuak ta a. Delhi-ah pawh hian rilru tharlam var hian kan lo thleng ve thei tho a, mahse, keimahniin \an kan lak loh chuan kan awmtirh lam aia laktlak loh zawk, hawn tlak loh, hawn dawna card khelh paha dahkham tawk lek hi kan ni thei dawn e a tihte ka ngaihtuah a. Ka var ta hawk a.…Storms never last do they babe, Bad times all pass with the wind tih tluk tluk pah chuan ka coffee no chu ka dawm \ha sauh sauh a, Zikpuii Pa Hnuhmate tih chu dawnkana ke hlang meuhin ka chhiar \an ta a.